N’eo ket c’hoazh ken brudet hag al livaj met abaoe un nebeud bloavezhioù dija ez eus ur redenn mozaik a-vremañ ganet e Ravennes e Bro Italia. Bruzhunañ danvezioù ha bodañ tammoù evit krouiñ un dresadenn « 3 M » (teir ment) eo pal ar mozaik. Muioc’h-mui a arzourien a ra oberennoù a bep seurt gant teknik ar mozaik, Martine Blanchard en o zouez. Kinnig a ra plac’h a orin eus an Oriant taolennoù gant livioù flamm ha gant danvez a bep seurt e-barzh : marmor, mein-greun, amailh-gwer, houarnaj, feilhañs...
"Fromet gant al livioù"
War-lerc’h he studioù war an arzoù-kaer e Roazhon he deus dibabet Martine Blanchard ober he micher eus ar mozaik "posupl eo ober kalz traoù disheñvel gantañ hag ouzphenn e krogen da gavout hir ma amzer oc’h ober livaj ha livaj nemetken ! Fromet-kaer on gant al livioù ha plijout a ra din krouiñ traoù gant ma daouarn." Desket he deus teknikoù an arz-se gant Giovanna Galli, ur vestrez eus Italia hag abaoe e klask tout an danvezioù evit sevel taolennoù memes en natur evel mein pe c’hoazh istri an Intel.
Un arz a-vremañ
Hervez Martine Blanchard eo "ar mozaik diouzh ar c’hiz er mare-mañ met a-benn ar fin n’eo ket anavezet kement-se gant an dud, alies e vez kredet eo gwir vozaik ar perzh a vez er stalioù dudi-krouiñ gant tammoù gwer livet bihan pe gant karrellerezh met disheñvel-mik eo ar perzh a ran". Hag evit dizoleiñ an arz-se e vo posupl mont da Mirdi Breizh e Roazhon etre an 20 a viz Here hag an 8 a viz Du, un diskouezadeg gant arzourien a-vicher a zo aozet eno. Stil Martine Blanchard a vo lakaet war wel ivez : he zaolennoù a zo a-vremañ savet gant teknikoù hengounel hag oustilhoù kozh. "N’eo ket difiñv ma stil, plijout a ra din ober taolennoù disheñvel. N’eo ket rakreset an taolennoù en a-raok, oc’h ober anezho e teu mennozhioù, depend a ra eus an danvez ivez ha se a blij din, dieub a-walc’h on" eme Vartine Blanchard.
C’hoant da dreuzkas
Sot eo Martine Blanchard gant he labour ha c’hoant kreñv ganti treuzkas hec’h anaoudegezh d’an holl. Eviti tout an dud a c’hell deskiñ sevel mozaik ha reiñ a ra kentelioù bep sizhun da merc’hed klañv gant ar boeson en ur greizenn e Gwidel evit sikour ganto. Desket he deus ivez mozaik d’an aktourien er film savet gant Manuel Poirier, Les Femmes... où les enfants d’abord. Ha m’hoc’h dedennet gant hec’h arz e voc’h degemeret gant Martine Blanchard en he stalier-diskouezva e Sant-Goustan en Alre.
RSS 2.0
